ಹಾದರ ಅದರ ಹೆಸರಲ್ಲ!!

ಊರು, ಕೇರಿ, ಸಾಗರ, ಪ್ರವಾಹ, ಪ್ರಳಯಗಳ

ಸಾರಿಸಿ ಗುಡಿಸಿ ರಂಗೋಲೆ ಹಾಕಿ

ಕಸವೆಲ್ಲ ಹಸನುಮಾಡಿ

ಗೊಬ್ಬರವಾಗಿಸಲು

ತಿಪ್ಪೆಸೇರಿಸಿದೆ;

ನೆಲವೆಲ್ಲ ಹಸಿರಾದ ಮೇಲೆ

ಮೇಲೆ ನಿಂತು ನಗುವ

ಸೂರ್ಯನೂ ನೀನೆ..

ಬೆಟ್ಟ, ಬೋಳು ಗುಡ್ಡ,

ಕಾವು, ಹಸಿವು, ನಿದ್ದೆ , ಮಂಪರುಗಳ

ಕಳೆದು ಬಂದೆ,

ನೀನು ನೀನಾಗಿ

ಬಂದದ್ದೇ

ಸೋಜಿಗ..!

ಮನಸ್ಸು ಕೂಡಬೇಕಿತ್ತು

ಮುಖ್ಯ;

ಹರಿದ ಬಾಳೆ ಎಲೆಯಾಗಿ ಗಾಳಿಗೆ,

ತರಗಾಗಿ ಬೆಂಕಿ ಉರಿನಾಲಿಗೆಗೆ

ನಿನ್ನ ಎದೆ ಬಾನಲ್ಲಿ

ಹೊಗೆ ಎದ್ದವನು ನಾನು.

ಜೀವಕ್ಕೆ ಉಸಿರಾಗಿ

ಹಿಡಿಬೇವು ಹಿಡಿದು, ಜಗಿದು

ಕಹಿತೋರಿ,

ಮೊಲೆವಾಲು ಕುಡಿಸಿದವಳು,

ನಿನ್ನ ಗರ್ಭದಿಂದ

ನನ್ನ ನಾಭಿಗೊಂದು

ಕರುಳಬಳ್ಳಿ;

ಹಾದರ ಅದರ ಹೆಸರಲ್ಲ?!

(01-08-2011)