ಅನುಭವಗಳನ್ನು ಗಾಳಿಗೆ ತೂರುವ ಟೀಕುಟಾಕು ಕನಸುಗಳು...

-1-

ನದಿಯೇನೂ ಸುಮ್ಮನೆ ಹುಟ್ಟುವುದಿಲ್ಲ

ಸುಮ್ಮನೆ ಹರಿಯುವುದಿಲ್ಲ,

ಧುಮುಕಿ, ಧುಮ್ಮಿಕ್ಕಿ, ಕಾಡು ಮೇಡು

ಹತ್ತಿ ಇಳಿದು

ಬಸಿದು, ಆವಿಗೊಂಡು

ಉಳಿದಿದ್ದೊಂದಿಷ್ಟು

ಸಾಗರದ ಪಾಲಿಗೆ.

-2-

ಚುಕ್ಕಿ ಚುಕ್ಕಿಗಳ ಕೂಡಿಸಿ

ರಾಶಿ ರಾಶಿ ಗ್ರಹಗತಿ ಜೋಡಿಸುವ

ಹರಾಕು- ತಿರುಮ , ಸಂಗಮ, ಕೂಡಲು

ಜೋಡಿ,

ಹಾಸಿಗೆ ಹಾರಾಕಿ,

ತಡಿಕೆ ಮಗ್ಗಲು ಮಾಡಿ

ಮಿಂದು ಬರುವ

ಬುಡ ಬುಡಕೆ

ಅದೆಲ್ಲಾ ಸತ್ಯ-ಸುಳ್ಳು...

-3-

ಒಂದು ಕಥೆ-

ಅಲ್ಲಿ ಬಂದ ಹಾಳೂರಿಗೆ

ಒಬ್ಬ ರಾಜಕುಮಾರ

ಅವನದು

ಬೇವಾರ್ಸಿ ರೂಪು,

ತುದಿ ಮೊದಲು ತಿಳಿದಿಲ್ಲ

ತಪರಾಕಿ,

ನೆಲೆ ಕಟ್ಟಿ, ಹೊಲ ಮಾಡಿ

ಬೆಳೆದು ತಿಂದು

ಆಮೇಲವನು

ಬೇಸಾಯಗಾರ.

ಒಂದು ದಿನ-

ಅದೇ ಉಳುಮೆ, ಅದೇ ಬೆಳೆ

ಅದೇ ಊಟ,

ರಾಜಕುಮಾರನಿಗೆ ಬೇಜಾರಾಯ್ತು,

ಆದರಾಗಲೇ ಆತ

ಬೇಸಾಯಗಾರನಾಗಿದ್ದ.

ಒಂದು ಕ್ಷಣ-

ಅನಿಸಿತ್ತು ಬೇಸಾಯಗಾರನಿಗೆ

ಜೋಡಿ ಮೊಲೆ, ಕೂಡು ಯೋನಿ,

ಅದೇ ಸಂ-ಭೋಗ, ಸಂಸಾರ....,

ನದಿಯಾಚೆಗೇನಿದೆ

ಸುಡುಗಾಡು?????

ಲೋಕ????????

ಉಪಸಂಹಾರ-

ಮೂಗುದಾರ ಕುಯ್ದು ಹೊಡೆದ ದನಗಳ,

ನೇಗಿಲು ನೊಗ ಗೆದ್ದಲಿನಾಸ್ತಿ,

ಹೇಳದೇ ಕೇಳದೇ

ರಾತ್ರೋ ರಾತ್ರಿ ನದಿ ದಾಟಿದ ರಾಜಕುಮಾರ

-ವೀರ-

ಅವನ ಬುತ್ತಿ ತುಂಬಾ

ಬರೇ ಕನಸುಗಳು.

-4-

ನದಿ

ಈಗಲೂ ಸುಮ್ಮನೇ ಹರಿದಿಲ್ಲ,

ಕನಸುಗಳು ಕಡೆಯುತ್ತಿವೆ,

ಕಾಡುಗಲ್ಲ ತಿಕ್ಕಿ ಹೊರಳುವ ಪ್ರತಿ ಹನಿ

ನೀರೂ........

ಹೊರಲಾಗದ ಭಾರ

ನದಿ ಮೇಲೆ

ಸಾಕು ಸಾಕೆಂದರೂ

ನಿಂತಿಲ್ಲ

ಪಯಣ!!!!

(24-05-2011)